Redelibros 2.0: comezan os cambios

• Publicado por Redelibros 01 Setembro 2011 - Arquivado en Autores - 1.236 visitas

  Un ano xa. Un ano desde que abrimos a rede e uns cantos de vós comezastes a rexistrarvos, a tentear como respiraba este novo proxecto, a suxerirnos isto e aquilo. Un ano e a rede medrou, o número de usuarios medrou, as seccións e as opcións medraron. Foi un ano tremendo en moitos aspectos: ilusionante, complicado, de moito traballo e, sobre todo, de moitísima participación. Vosa e de Redelibros, dentro e fóra de Internet. Aí quedaron, sen ir máis lonxe, as quedadas redelibreras en Gaxate, Santiago ou Liméns, a presenza no Culturgal e nas feiras do libro, os concursos e talleres de relatos, a vosa presenza continua na rede...

  Asegurámosvolo: cando comezamos a darlle voltas a esta idea de tolos nin se nos pasaba pola cabeza que fósedes tantos os tolos que nos fariades compañía. Pero a realidade, como adoita dicirse, supera á imaxinación. E, un ano despois, coa vosa participación e o voso apoio, logramos crear e consolidar un espazo propio de cultura na rede, unha casa de todos -cada vez de máis- na que nos sentimos a gusto e na que atopamos amigos, opinións, cultura, vida.

  Durante un ano, Redelibros foi crecendo non só en usuarios, senón tamén en servizos -aí está a tenda de redepuntos, os Cadernos Redelibros, os concursos, os textos, o "Fisgando na rede" e tantas outras seccións non previstas inicialmente, moitas incorporadas grazas ás vosas suxestións. Pero xa sabedes que a rede é un terremoto continuo, e nós non queremos quedarnos agochados baixo o colchón.

  
  Cremos que Redelibros xa está suficientemente madura para dar o seguinte paso: para seguir evolucionando. Por iso, nas próximas semanas asistiremos a unha chea de cambios importantes, algúns relacionados co aspecto da rede e outros cos novos servizos que iremos incorporando.

  
  A primeira fase é a renovación dos menús e a potenciación dos perfís persoais.
  
  Empecemos polos novos menús. Agora atoparédesvos cunha barra superior algo distinta (a amarela que está debaixo da imaxe da herba e o libro). A anterior xa non daba máis de si (¡demasiadas opcións!), polo que non nos quedou outra solución que agrupar os servizos da rede. Ademais, esta nova barra incorpora textos que axudarán aos recentemente chegados a guiarse entre o cada vez maior número de posibilidades que a rede ofrece. A idea, dende logo, é a de simplificar, aínda que aos que sodes habituais quizais vos custe un pouquiño habituarvos. Nesta barra de menú atoparedes seis opcións principais (Inicio, Libros, Textos, Ferramentas, Seccións e Colaboradores).

   

  • A través de Inicio accederedes a máis información sobre a rede, sobre como enlazarnos ou seguirnos e, tamén, ás seccións de preguntas frecuentes, quen somos, soporte técnico, etc. Como vedes, todo o relacionado coa nosa identidade e o funcionamento interno de Redelibros.

  
  

  • Libros e Textos non requiren de explicación, pois se manteñen igual que ata agora. Aquí poderedes consultar a base de datos bibliográficos, subir novos libros ou textos, etc.

  
  

  • Ferramentas agrupa todos aqueles servizos habituais dunha rede social: os apartados de opinión (blogs, grupos, enquisas), os anuncios (eventos ou clasificados), o apartado multimedia (álbums, vídeos, audios) e o de membros, que vos permitirá buscar a outros usuarios, invitar aos vosos amigos a sumarse á rede, etc.

  
  

  • Seccións, pola súa banda, agrupa aqueles apartados que, dalgunha forma, son "exclusivos", que forman parte da nosa identidade e non habituais nunha rede social: os Cadernos Redelibros (que antes chamabamos simplemente "Artigos", a Tenda de Redepuntos, os concursos (estade atentos, porque pronto empezaremos algún novo) e, en breve, aparecerá tamén unha sección que polo de agora está en probas, pero que potenciaremos nos próximos meses: Redelibros Televisión. Por certo que en breve farémosvos unha proposta moi interesante para que participedes nela...

  
  

  • Finalmente, Colaboradores mantense como ata agora: é o lugar polo que poderedes acceder aos microsites de cantos colaboran con Redelibros.

  
  Ademais, dende agora o espazo superior de procura (ese rectángulo branco que aparece arriba de todo, á beira de "Pechar sesión") incorpora unha nova utilidade: a de suxerirvos opcións. Se escribides nel un termo calquera (un nome, un título, un concepto) e non lle dades a "enter", ao cabo duns segundos aparecerá un cadro desplegable con diferentes suxestións de contido na web. Iso si, se presionades "enter", iredes á páxina de procuras habitual...
  
  Pero hai máis: para facilitarvos o acceso rápido a calquera apartado da rede, a partir de agora atoparédesvos cun novo menú amarelo na parte inferior da páxina. Nel están á vista os enlaces a todas as seccións da rede. Agardamos que estes cambios resúltenvos cómodos!

  
  Seguimos pola potenciación dos perfís persoais. Esta é unha idea que levamos barruntando moito tempo, pois cremos que é un dos apartados fundamentais de calquera rede social: establecer relacións, coñecer máis aos outros usuarios. Para potenciar estes perfís, incorporamos varias ferramentas novas.

   

  • Sincronización automática con Twiter... Dende agora, aquel usuario que o desexe poderá sincronizar a súa conta en Redelibros co seu Twiter, de forma que na súa páxina de perfil aparecerán os seus fíos de Twiter de forma automática. Ademais, debaixo dos fíos haberá un botón que permitirá aos demais usuarios engadilo á lista das persoas ás que seguen en Twiter. Isto, cremos, permitiranos coñecer máis a cada usuario que así o desexe.

  
  

   

  • Valoración mediante estrelas de grupos, eventos e usuarios. En cada páxina de grupo, de evento e en cada perfil persoal aparecerán agora unha serie de estrelas que nos dan unha idea da aceptación que ten (o grupo, o evento ou o usuario) entre os demais redelibrer@s. O que pretendemos é que calquera poida valorar aquilo que máis lle gusta e, á vez, formarse unha idea rápida da aceptación que ten entre os demais ao entrar nun grupo, nun evento ou no perfil doutro usuario. Ademais, no noso propio perfil aparecerá un banner coa indicación dos usuarios mellor valorados polos demais.

  
  En fin, como vedes temos unha boa cantidade de cambios. Pero isto é só a primeira fase: para o máis gordo, os novos servizos que vos ofreceremos en breve (algún, asegurámovolo, realmente interesante), aínda teredes que agardar un chisco máis...

  
  
  A partires do sábado, benvidos á Redelibros 2.0. Seguimos léndonos, redelibrer@s!